बडबड(बायकोची)

बडबड(बायकोची)

(Sketch credit- Deepti Patwardhan, a friend with amazing skills with pencil and colours)

किती बोलतेस

अगदी कशावरूनही

कधीही आणि कुठेही

बऱ्याचदा उगाचच

पुष्कळदा नकळत

काहीवेळा असंबद्धही

घडाघडा बोलतेस

भडाभडा बोलतेस

तडातडा बोलतेस

लोकांशी बोलतेसच

वस्तूंशीही बोलतेस

वेड्यासारखी स्वतःशीही

आईसारखं बोलतेस

मुलीसारखं बोलतेस

बायकोसारखं तर बापरे

आनंदांत बडबड

दुःखात रडारड

सगळं कसं शब्दांत

उत्साहात तार स्वर

काळजीत कातर

भावनांचा पूर ओठांत

शब्दांचीच मिठी

शब्दांचीच आदळआपट

प्रणय तेवढा मुका

तुझ्या शब्दांच्या उन्हात

माझं जगणं बहरून येतं

तुझ्या एवढ्याश्या अबोल्यात

सारं जग अंधारून जातं

       - अमोल मांडवे